Фото: Google

Жаңа коронавирус – COVID-19 вирусы байқалған елдердің саны 75-ке жетті.

Вloomberg сайтындағы өңделген мәліметтер бойынша, қазіргі уақытта коронавирус жұқтырғандар саны әлем бойынша 94571 адамға жеткен. Ал қайтыс болғандар саны – 3270 адам.

Оңтүстік Корея қауіпті вирус жұқтырғандар саны жоғары елдер тізімінде тұр: 5766 адам карантинде жатыр, 35 адам қайтыс болды.

Еуропадағы вирус ошағына айналған Италияда наурыздың 15-іне дейін мектептер жұмысын тоқтатты. Соңғы мәліметтер бойынша, мұнда 3089 адам ауруға шалдығып, 107 адам қайтыс болған.

Иранда COVID-19 дерегі барлық аймақта тіркелген. 2336 адам вирус жұқтырса, 77 адам қайтыс болған.

Ұлыбританияда бір күннің ішінде 34 адам вирус жұқтырса, Францияда 257, ал Германияда 262 дерек тіркелді. Сақтық шараларын күшейткен Еуропа елдері бюджеттен қаржылай көмек қарастырып жатыр.

Америкада 126 адам вирус жұқтырса, 11 адам өлім құшқан. Сол себепті Калифорния штатында төтенше жағдай жарияланды. Осы аптада АҚШ-тың өкілдер палатасы коронавируспен күресуге арналған жаңа заң жобасын дауысқа салып мақұлдады. Құжатқа сәйкес федералды бюджеттен 8,3 млрд доллар қаржы бөлінеді.

"The Qazaq Times"