Фото: https://news.rambler.ru

Ресей президенті Владимир Путиннің Түркия президенті Режеп Тайып Ердоғанмен кездесуі 22 қазанда Сочиде өтеді. Бұл туралы Ресей президентінің баспасөз хатшысы Дмитрий Песков хабарлады.

Тараптар  Түркияның Сүриядағы әскери операциясын талқылап, С-400 зымырандары жөнінде келіссөз жүргізу жоспарлаған. Осыған дейін Ердоған: «С-400 зымыран жүйесі Түркияға бейбітшілік және тұрақтылық орнатуға көмектеседі. Біздің тарапымыздан қабылданып жатқан шаралардың барлығы Түркия қорғанысын күшейтуге бағытталған. Анкараның соғыс ашу жоспары жоқ», – деп мәлімдеген болатын.

2017 жылы желтоқсанда Түркия Ресеймен С-400 зымыран жүйесін сатып алуға байланысты құны 2,5 миллиард долларды құрайтын келісімге келген. 12 шілдеде Анкара С-400 жүйесінің алғашқы легін қабылдап алған.

Путиннің түрік көшбасшысын кездесуге шақыруының тағы бір себебі – Сүрия дағдарысы. 9 қазанда Түркия Сүрияның солтүстігінде «Бейбітшілік қайнары» аталатын арнайы операция бастаған. Түрік авиациясы мен артиллериясы көрші ел аумағындағы күрд жасақтарын соққыға алды. Әскери операцияның мақсаты – лаңкестерге оңтүстік шекарада дәліз құруға жол бермеу.

"The Qazaq Times"