Бірлескен оқу-жаттығу Үнді мұхитының Парсы шығанағына жақын маңда өткізілуі мүмкін. Фото: Jerusalem Post.

Ресей Парсы шығанағындағы ойындарға шындап кіріспек. Екі елдің Сыртқы істер министрлігінің өкілдері қыркүйектің басында Мәскеуде кездесу өткізгеннен кейін Ресейдің шығанақ маңындағы белсенділігі арта түсті. Бір күн бұрын екі ел бірлескен әскери оқу-жаттығуларын өткізуге дайын екендерін жеткізді.

Иранның IRNA ақпараттық агенттігінің хабарына қарағанда, Ресей мен Иран теңіз күштері бірлескен оқу-жаттығуды Үнді мұхитында өткізбек. Иран СІМ тарабы жаттығудың бейбіт мақсатта өтетінін, өзге елдердің де қатысуға өтініш білдіріп жатқанын айтқан.

Иран Сыртқы істер министрі Жавад Зариф АҚШ-тың Иранға қарсы әрекеті дұшпандық әрекет деп бағалап, Құрама Штаттың шығанақтағы әскери әрекеттеріне қарсы және өңірлік қауіпсіздікті қамтамасыз ету мақсатында Ресеймен қорғаныс, соның ішінде теңіз қорғаныс саласында ынтымақтастықты дамыта түсетіндерін жеткізген.

Иран мен Ресейдің әскери жаттығу туралы мәлімдемелерінен кейін, Израиль АҚШ және Ресейді Иран тақырыбын талқылауға үштік кеңеске шақырған. Израиль тарабы Иранның Сүриядағы әрекеттері Израильдің қауіпсіздігіне қатер төндіреді деп айыптап келген.

“The Qazaq Times”