Өзбекстан президенті Шавкат Мирзиеев пен Қытай басшысы Ши Жиңпиң.

Өзбекстан мен Қытай бірлескен инвестициялық қор құрды.

Тамыз айының 27-і күні Өзбекстан премьер-министрі Абдулла Ариповтың Қытайға жасаған ресми іссапары барысында Иновация және сыртқы сауда министрлігі мен СІТІС корпарациясы негізгі капиталы 1 миллиард долларды құрайтын бірлескен инвестициялық қор құруға уағдаласты. Алдын ала болжам бойынша, қор қаржысының негізгі бөлігі Өзбекстандағы мұнай-газ, химия өндірісі салаларына бағытталмақ.

2016 жылдың желтоқсан айында «Kazah Invest» компаниясы мен «Жібек Жолы» қоры бірлесіп Қазақ-Қытай инвестициялық қорын құрған. Оның бастапқы капиталы 2 миллиард доллар болған. Бұдан бөлек Қазақ-Қытай қоры Астана халықаралық қаржы орталығының 5 пайыз акциясын сатып алған.

Қыркүйек айының басында президент Қасым-Жомарт Тоқаев Қытай еліне ресми іссапармен барады. Әзірге іссапар барысында қай бағытта келіссөздер жүргізілетіні белгісіз. Кеше мемлекет басшысы Қытайдың Қазақстандағы елшісі Чжан Сяоны қабылдап, аталмыш іссапарға байланысты пікір алмасты.

"The Qazaq Times"