Қазақстан президенті Қасым-Жомарт Тоқаев және БҰҰ бас хатшысы Антониу Гутерриш. Фото: http://today.kz

Қазақстан президенті Қасым-Жомарт Тоқаев БҰҰ Бас хатшысы Антониу Гутерришке көңіл айту жеделхатын жолдады.

Мемлекет басшысы Қазақстан халқының және жеке өзінің атынан Бенгазидегі жарылыс салдарынан қаза тапқан БҰҰ-ның Ливиядағы миссиясы қызметкерлерінің отбасылары мен жақындарына көңіл айтты.

Жеделхатта: «Бұл зұлымдыққа толы лаңкестік шабуыл ізгілік пен жанашырлық құндылықтарын дәріптейтін қасиетті мұсылман мерекесі – Құрбан айт қарсаңында жасалғаны аса жан түршігерлік жағдай болып табылады. Әлемдік қауымдастықтың зорлық-зомбылыққа қарсы бірлескен және батыл күреске шақыратын үндеуін берік қолдай отырып, Қазақстан лаңкестіктің ешқандай түрі мен көрінісін қабылдамайды. Біз БҰҰ қызметкерлерінің жаһандық ұйымның игі мақсаттарына қол жеткізу жолындағы қызметін жоғары бағалаймыз», – делінген.

Қазір Ливияда Триполидегі Фаиз Сарадж үкіметі мен генерал Халифа Хафтар әскері арасында соғыс жүріп жатыр. Хафтар құрбан айтқа орай атысты уақытша тоқтататынын мәлімдеген. Дегенмен, 11 тамызда Ливияның Бенгази қаласында бомба жасырынған көлік жарылып, БҰҰ-ның 3 қызметкері қаза тапқан. БҰҰ Бас хатшысы Антониу Гутерриш қаза тапқандардың отбасыларына көңіл айтып, құрбан айт кезінде жасалған лаңкестікті қатаң айыптады.

"The Qazaq Times"