Ирак АҚШ-қа ел аумағын Иранға қарсы пайдалануға бермейді.

«Бағдад Уашингтонға ел аумағын Иранға қарсы жүргізілетін әскери әрекеттерге пайдалануға бермейді. Себебі Ирак Тәуелсіз ел. Мен жағдай одан ары ушықпайды деп үміттенемін. Біз аймақта кезекті рет жойқын соғыс болғанын қаламаймыз. Ирак проблема емес, сол проблеманы шешетін бір тарап болғысы келеді» - деді Хади АҚШ мемлекеттік хатшысының Ресейге жасаған сапарынан кейін журналистер алдында сөйлеген сөзінде.

Осыдан біраз уақыт бұрын Ирактағы АҚШ әскери контингенті күшейтілген рейжимде қызмет атқаруға көшкен. Пентагон бұл шешімін Иран тарапынан болуы мүмкін арандату әрекеттерімен түсіндірген.

Бұған дейін АҚШ Таяу Шығысқа Абраам Линкольн ұшақтасымалдағыш кемесі мен қосымша бомбалаушы ұшақтарын аттандырған.

Өз кезегінде Иран АҚШ-тың Таяу Шығыстағы іс-қимылдарына жауап ретінде «Теһранның бұдан былай Уашингтонмен ядролық келісімге байланысты ешқандай келіссөздер жүргізбейтіндігін» айтып, кез келген арандатушы әрекетке соққымен жауап беретінін мәлімдеген.

"The Qazaq Times"