Фото: Башар Асад

Сүрия Араб Республикасының президенті Башар Асад Сүриядағы қақтығыстың жалғасуына Батыс елдері жауапты деп мәлімдеді. Сүрия президенті бұл туралы 10 маусым күні Daily Mail басылымына берген сұхбатында айтқан, деп хабарлайды «evrensel.net» агенттігі.

«Қақтығысты бір жылдың ішінде реттей аламыз деп үнемі айтып келемін. Бұл аса қиын шаруа емес. Бірақ оны сыртқы килігулер қиындатуда. Біз осы мәселеде алға жылжыған сайын, Батыс та террористерге үлкен қолдау көрсетуде», - деді Асад. Ол сүриялық заңды билік саяси және әскери тұрғыдан неғұрлым жетістікке жетсе, Батыс, әсіресе АҚШ, Ұлыбритания және Франция соғұрлым қақтығысты созып әрі оның реттелуін барынша алыстатуда, - деп нақтылады.

Негізінде, Башар Асадтың Сүриядағы жағдайға кінәліні Батыс елдерінен, әсіресе АҚШ-тан көретіні, елдегі террорлық топтарға тікелей қолдау көрсетеді деп кінәны сырттан іздейтіні бір бұл емес. Сырт көзге де белгілі, Асад режимі елдегі азаматтық соғысты ауыздықтаудың орнына, керісінше одан сайын ушықтырып жатқаны белгілі. Халықаралық саяси сарапшылар да Асад елдегі жағдайды реттеуден гөрі, керісінше сыртқы алпауыт елдерге көбірек иек артады деген пікірде.

“The Qazaq Times”