Фото: RT

Түркия президенті Режеп Тайып Ердоған «АҚШ пен Израильді тарих кешірмейді» - деп мәлімдеді.

Anadolu ақпарат агенттігінің мәліметінше, Режеп Тайып Ердоған Лондонға жасаған іс-сапары барысында Ұлыбритания премьер-министрі Тереза Мэймен бірлескен баспасөз мәслихатын өткізген. Онда ол: «Тарих АҚШ пен Израильді кешірмейді. Халықаралық келісімдер мен БҰҰ-ның қарарына сәйкес Иерусалим мәртебесі еш уақытта өзгермеуі тиіс» - деген.

Бұған дейін Режеп Тайып Ердоған АҚШ-тың Тель-Авив қаласындағы бас елшілігін Иерусалимге көшіруін қатаң сынға алып, Уашингтон мен Тель-Авивтегі елшілерін кері қайтарған.

Естеріңізге салайық, мамыр айының 13-і күні АҚШ Тель-Авив қаласындағы елшілігін Иерусалим қаласына көшірген. Елшіліктің ашылу салтанатына АҚШ қаржы министрі Стивен Мнучин, Дональд Трамптың қызы Иванка Трамп және президент кеңесшісі Джаред Кушнер қатысқан.

“The Qazaq Times”