Үш ел басшысы Анкарада бас қосты. Фото: Анадолы.

Бүгін Түркияның орталық қаласы Анкарада Түркия, Ресей және Иран елдерінің басшылары бас қоспақ. Кездесудің басты тақырыбы Сүрия мәселесі, ондағы саяси шешімдер туралы болады деп хабарлауда түрік ақпарат құралдары.

Ресей президенті Владимир Путин мен Иран президенті Хасан Рухани Анкараға барып, Түркия басшысы Ердоғанмен бірге үш жақты кездесу өткізбек. Кездесуде Сүрияның территориялық тұтастығы, Астана процесінің жалғасуы, қақтығыссыз аймақтарды тұрақтандыру, оған қоса маңызды саяси шешімдер мен терроризмге қарсы күрес тақырыптары талқыланбақ.

Түркияның «Анадолы» ақпараттық агенттігінің хабарына қарағанда, үш жақты кездесуден бір күні бұрын Түркия мен Ресей арасында жоғары деңгейдегі ынтымақтастық кеңесінің 7-ші отырысы Анкарада болып өткен. Екі ел басшылары Түркия мен Ресей арасындағы қарым-қатынасты ауқымды түрде кеңейту туралы бірқатар келісімге келген. Бұл туралы хабарларға қарағанда, Ердоған мен Путин экономикалық байланысты тереңдету, «Түрік ағыны» экономикалық жобасы, Аккую атом стансасы және S-400 зымыранға қарсы қорғаныс жүйесін сату-сатып алу мәселелері талқылаған. Екі ел президенті Аккую атом электр-стансасының іргетасын қалау рәсіміне қатысқан.

“The Qazaq Times”