Фото: rferl.org

Тәжікстан Еуразиялық экономикалық одаққа мүше болуы мүмкін – деп хабарлайды Sputnik Тәжікстан ақпарат агенттігі.

Қараша айының 20-сы күні Ресей Сыртқы істер министрі Сергей Лавров Баку қаласындағы ADA университетінде сөйлеген сөзінде: «Ресей Әзірбайжанның ЕАЭО-ға мүше болғанын қай уақытта болса да қолдайды. Қазіргі таңда Тәжікстанды Еуразиялық экономикалық одаққа қабылдауға байланысты құжаттар қаралуда» - деген.

Естеріңізге салайық, бұған дейін Тәжікстан кеден қызметі төрағасының орынбасыры Хуршед Кәрімзода: «Тәжікстан үкіметі ЕАЭО-ға мүше болуға байланысты Қырғызстан мен Армения елдерінің тәжірибесін қарауда» - деп мәлімдеген болатын.

Көптеген тәжікстандық сарапшылардың сөзінше, Еуразиялық экономикалық одаққа мүше елдер Тәжікстанды одаққа қабылдауды әдейі кешіктіріп отыр. ЕАЭО-ға мүше боламын деп жүрген соңғы екі жылда ел үкіметі алты миллиард доллар қаржы жоғалтқан.

“The Qazaq Times”