Күрд қарулыларының қарауылы. фото: Правда.ру.

Ирак Күрдістаны билігі Бағдатпен келіссөзді бастау үшін өткен айдағы заңсыз деп табылған референдумнан кейінгі қадамдарды тоқтатуды ұсынып отыр. Естеріңізде болса референдумға қатысушылардың басым көбі Күрдістанның тәуелсіздігін қолдап дауыс берген еді. Бұл туралы BBC-дің онлайн қызметі хабарлады.

Ирак үкіметі Күрдістанның тәуелсіздік жөніндегі референдумына жауап беру үшін осыдан бұрын ірі әскери қадамға барған болатын. Ирак үкіметіне қарасты әскерлер Киркук қаласын және маңындағы бірнеше қаланы бақылауына алып, күшпен басып кірген болатын.

Бұған қарсы тұрған күрд қарулы күштері мен Ирак үкімет армиясы арасында болған қақтығыстан оннан астам адам қаза тауып, көптеген адам жарақат алған. Азаматтық соғыстың болуынан алаңдаған Күрдістан билігі күрдтерге оқ шығармауды ескертіп, шегінуге үндеді.

Қазір Күрдістан билігі тәуелсіздік туралы референдумға әскери әрекетпен жауап қайтармақ болған Бағдат билігін келіссөзге шақырды. Күрд қарулы күштері мен Бағдат үкіметінің күштері арасындағы қақтығыс жалғаса берсе бұдан да көп адам шығыны болатынын ескертті. Қазірге дейін Бағдат билігі бұған жауап қайтарған жоқ.

“The Qazaq Times”