Қазақстандықтар азық-түлікті аз тұтына бастады

Қазақстандық отбасылар ең көп қаражатты тамаққа жұмсайды. 2017 жылдың 1 тоқсаны бойынша жалпы тұтынушылық шығындардың ішінде қазақстандықтардың азық-түлікке жұмсаған қаржы үлесі 45,9%-ды құрады. Ал өткен жылдың 1 тоқсанында бұл көрстекіш 44,4% болған. 

Ranking.kz агенттігінің мәліметінше, бұл соңғы бес жылдағы ең жоғарғы көрсеткіш. Мысалы 2012-2014 жылдары азық-түлікке кеткен шығындар 41,8%-ға қысқарған. Алайда 2015 жылы тамаққа жұмсалған шығын 43,5%-ға өскен.

Дегенмен бағаның жоғарылауына байланысты шығын ұлғайғанмен, тұтыну көлемі азайып отыр.

Қазақстандықтар ең көп қаржыны ет және ет өнімдерін сатып алуға жұмсайды екен. Мысалы 2016 жылдың төрт айында тұтыныушылық бюджеттің 14,6%-ы осы тағамды сатып алуға жұмсалса, биыл бұл көрсеткіш 15,3%-ға өскен. Яғни осы жылғы төрт айда әрбір қазақстандық 18,2 кг ет жеген.

Бұдан бөлек нанға және жарма өнімдеріне тұтынушылық шығын 7,4%-ды құрады. Нан және жарма өнімдерін тұтыну бір жылда 0,7%-ға өскен.

Сондай-ақ, Қазақстанда көкөністер бағасы бірнеше есеге қымбаттағандықтан оған кететін шығын да ұлғайған. 2017 жылдың алғашқы төрт айында көкөніс сатып алуға кеткен қаржы 3,4% болса, өткен жылы бұл көрсеткіш 3,1% болған.

Мысалы осы жылы қазақстандықтар картоп сатып алуды азайтқан. Жан басына шаққанда төрт айда әрбір қазақстандық 8,1 кг картоп тұтынған. Тәттілерді де аз тұтына бастаған. Сондай-ақ, жағдайы жоғары халықтың 10% нан және жарма өнімдерін 5%-ға, ет және ет өнімдерін 4,7%-ға артық тұтынған.

Жалпы алғанда бай және кедей қазақстандықтардың арасында азық-түлікті тұтынуға кеткен шығындар айырмашылығы жер мен көктей.

“The Qazaq Times”