Фото: BBC WORLD SERVICE

Миссисипи университетінің кампусына кіретін медициналық орталықтың аумағында жеті мыңға жуық адамның қабірі табылды. Жалпы қабірлер орналасқан аудан 8 гектар аймақты алып жатыр.

XIX – XX ғасырларда бұл жерде психиатриялық аурухана орналасқан. Қайтыс болған емделушілерді осы жерге жерлеп отыратын болған.

Биліктегілердің есептеуінше қабірлерді ашып, қайта жерлеуге 21 миллион доллар кетеді екен, әр қабірге – 3 мың доллардай қаражат жұмсалады. Медициналық орталықтың басшылығы бұның барынша тиімді жолдарын іздестіруде.

Миссисипи штатындағы алғашқы психиатриялық емханалар 1855-1935 жылдар аралығында жұмыс жасаған. Ал бұндай емханалар пайда болғанға дейін науқастарды түрмелерде, жертөлелер мен оқшауланған жерлерде шынжырмен матап, қамап ұстаған.

1855-1877 жылдар аралығында емханада 1376 науқас тіркелген, олардың кем дегенде әрбір бесіншісі емханада жан таптсырған. Ал АҚШ-тағы азаматтық соғыстан кейін науқастардың саны артып, 6 мыңға жеткен болатын.

Алғашқы қабірлер кампустың жанына жол салу барысында 2013 жылы табылған. 2014 жылы мәйіттердің саны мыңға жеткен.

“The Qazaq Times”