Жаңа «тәж тәрізді вирус» алғаш тіркелген Қытайдың Ухан қаласында індет қайта тарады. Індетке шалдыққан бірнеше науқас байқалғаннан кейін ухандықтар қайта тесттен өткізіліп жатыр. Бұл туралы Қытайдың жергілікті ақпарат құралдары мәлімет таратты.

Алғашқы мәліметтерге сәйкес, індет қаланың 7 тұрғынынан байқалған. Бұл Уханда бір жылдан астам уақыттан бері алғаш рет тіркелген жағдайы. Қытай пандемияны ең өнімді тежеген ел ретінде аталғанымен, соңғы күндері індет жұқтырғандардың тіркелуі жиіледі. Елдің 15 провинциясында індет қайта тарай бастады.  10 күн ішінде 300-ден аса кейс тіркелген.

Қытай ресмилері індеттің қайта жандануын аса жұғымтал «Дельта» вирусы және ішкі туризм сезонымен байланыстырады. Сейсенбі күні 90 жаңа жағдай тіркелгеннен кейін Ухан қаласының тұрғындарына құлақтандыру жарияланды. Вирустың жаңа штамы Қытай орталығы Бейжіңнен де анықталды.

“The Qazaq Times”