Ашраф Ғани Ұлттық мәжілісте сөз сөйледі. Фото: BBC

Ауғанстан президенті Ашраф Ғани Ұлттық мәжілісте мәлімдеме жасап, «Талибанды» таңдау жасауға шақырды. Ол сөзінде Ауғанстан үкіметінің бейбітшілік үшін көп бодау беріп келгенін, ендігі таңдауы «не тәліптермен келіссөзге отыру, не соғысып жеңу» екенін айтқан.

Сөзін елді бірлікке шақырумен бастаған президент Ғани, елді қалпына келтіріп, терроризмге қарсы күресу үшін бұрынғыдан да бекем бірлік керек екенін баса атап көрсеткен. Сондай-ақ, үкіметтің басты ұстанымы бейбітшілікті қалпына келтіру, тұрақтылыққа жету екенін тағы бір рет айтып өткен.

Ауғанстан президенті бұған дейін Кабул билігі бейбітшілік пен тұрақтылықты сақтау үшін көп бодау бергенін айтқан. «Талибан не келіссөз үстеліне отырады, не соғыста жеңеміз. Бұл біздің таңдауымыз. Енді «Талибан» таңдау жасасын», – деген сөзінде Ашраф Ғани.

Қазір де, ауған жерінде үкімет күштері мен тәліптер арасында қақтығыс сұрапыл жүріп жатыр. Мәліметтерге қарағанда, үкімет тарабы 34 провинцияны толықтай бақылауында ұстап тұр. Ал, елдегі 407 ауданның 150-ден астамын тәліптер өзіне қаратқан.

“The Qazaq Times”