Былтыр желтоқсанда Алматы әуежайында апатқа ұшыраған Bek Air ұшағының екінші пилоты Мейіржан Молдақұлов қайтыс болды.

Алматы қаласы әкімдігінің баспасөз қызметінің хабарлауынша,  ауруханадан шығарылған 54 жастағы Молдақұлов үйінде дүние салған.

Ұшқыштың 5 қаңтарда ес жиып, жансақтау бөлімінен профильдік бөлімшеге ауыстырылғаны хабарланған. Ол ауруханадан 21 қаңтарда шығарылған еді. Қалалық денсаулық сақтау басқармасының мәліметіне қарағанда, 28 қаңтар кешкі 18.00-де жедел жәрдемге Молдақұловтың жағдайы нашарлағаны жайлы шақырту түскен. Жедел жәрдем дәрігерлері науқастың жүрек қағысын қалпына келтіруге тырысқанымен ажалдан арашалай алмады.

"The Qazaq Times"