Жапонияның бас уәзірі еврей жұртында. Фото: Анадолы.

Жапонияның бас уәзірі (премьер-министрі) Шинзо Абе (Синдзо Абэ)  Шығыс туры аясында Израиль жұртында сапарда болды. Оның Израиль премьер-министрі Беньямин Нетаньяху арнайы күтіп алды. Екі ел басшысы Израиль мен Жапония арасындағы қарым-қатынастармен қоса, өңірлік мәселелер төңірегінде де сөйлесті. Бұл туралы «People» басылымы хабарлады.

Израиль премьер-министрі кездесуде Иранның алты ел қол қойған ядролық келісімге адал болмағанын алға тартты. Ол Иран режимі ядролық бағдарламаны жасырын жүзеге асырып жатқанын қайталады.

Кездесу кезінде Беньямин Нетаньяху: «Иран өзінің ядролық бағдарламаларын табысты түрде сақтап келді. Алты ел қол қойған келісім Иран режимінің өтіріктері мен жалған ақпаратына негізделген нашар келісім болып қалды», – деді.

Осы аптаның бас шенінде Израиль тарабы сол елдің Барлау агенттігі жинаған ақпараттарды жария етіп, Иран тарабының жасырын түрде ядролық бағдарламаны жүзеге асырып жатқанын мәлімдеген болатын.

“The Qazaq Times”