Беларусь-Польша шекарасы 5 күн бұрынғы жағдай. Фото: BBC

Беларусь пен Еуропа Одағының, нақтырақ айтқанда Беларусь пен Польша шекарасында босқындар дағдарысы күшеп, геосаяси тіреске айналып тұрған шақта, Өзбекстан ЕО тарабына ыңғайлы қадам жасады. Тәшкент билігі Орта Шығыс елдерінің азаматтарын Беларусьқа жеткізетін әуе жолдарына шектеу қойды.

Өзбектің «Узавиация»-сынің ресми мәлімдемесіне сай Ирак, Сүрия, Ауғанстан, Йемен, Ливан және Ливиядан Беларусьқа ұшатын азаматтарға ұшақ билетін сату шектелді. Бірақ, бұндай шектеулер Беларусьта тұрақты тұруға құқылы немесе дипломатиялық паспорты бар тұлғаларға қаратылмаған.

Шекарадағы босқындар дағдарысына байланысты Еуропа Одағы Беларусьқа босқындар тасыған әуе және туристік компанияларға санкция салатынын мәлімдеген еді. Осыдан кейін бірқатар түрік және сүриялық әуе компаниялар мен туристік компаниялар Орта Шығыстан Минск бағытындағы әуе қатынасына белгілі шектеулер кіргізді.

Қазір Польша-Беларусь шекарасында мигранттардың дағдарысы әлі жалғасып жатыр, дегенмен кешеден бастап босқындардың бірқатары кері қайтып жатқанын Польша шекара қызметі хабарлаған. Әлі де мыңдаған мигрант лагерлерді паналап тұр.

The Qazaq Times