Әлеуметтік желіде тараған видеодан скриншот.

Бүгін, 20 қыркүйек күні Алматы қаласы Алатау ауданы "Ақбұлақ" шағынауданында атыс болып, бес адам қаза тапты. Бұл ақпарат қалалық полиция департаменті хабарлады.

Полиция таратқан ақпаратқа қарағанда, сағат 17.00-де Алатау ауданы, "Ақбұлақ" мөлтекауданында 1967 жылы туған Д. есімді азамат үйден шығару туралы сот шешімін орындатуға келген сот орындаушыларына, учаскелік полиция инспекторлары мен төтенше жағдай департаменті қызметкерлеріне оқ атқан.

Оқиға кезінде бес адам қаза тапты, олардың екеуі – қызметтік міндетін атқарып жүрген полиция қызметкерлері: полиция майоры Дархан Сүлеев пен полиция капитаны Нұрбол Байғазиев. Бұған қоса, сот орындаушы М.Әбенов пен екі адам оққа ұшқан. Бейресми ақпаратқа қарағанда, көз жұмған екі адам қатардағы тұрғын.

"Күдіктінің қаруы тартып алынып, қамалды. Жағдай бақылауға алынды. Қылмыстық іс қозғалды. Тергеу жүріп жатыр" делінген Алматы қалалық полиция департаментінің хабарламасында.

The Qazaq Times