Аустралия Қытай жобасынан бас тартты. Фото: Eddiba Sports

Аустралия Қытайдың «Бір белдеу, бір жол» жобасынан түбегейлі бас тартқанын мәлімдеді. Іле-шала Байден үкіметі Қытайға қарсы өз одақтастарымен бірлесе жұмыс істейтінін айтты.

Аустралия СІМ басшысы Пейн ханым сәрсенбіде Аустралия Федералды үкіметі Қытаймен 2018 және 2019 жылдары Викторияда жасасқан «Бір белдеу, бір жол» жобалары бойынша келісімдерін тоқтатқанын мәлімдеді. Пейн ханымның айтуынша, бұл екі келісім былтыр Аустралия парламенті қабылдаған «Халықаралық қатынастар туралы» жаңа заңға сәйкес келмейді.

Қытай Сыртқы істер министрлігі Аустралияның бұл қадамын еларалық келісімді құрметтемеу деп айыптады және қатаң сынға алды.

Сәрсенбіде Ақ үйдің ресми өкілі одақтастарының шешімін қолдап мәлімдеме жасады. «Әрине, Қытайға қатысты мәселелер біздің одақтастарымыз және халықаралық қауымдастықтағы үйлестіру мен ынтымақтастық істеріне қиындықтар әкеледі», – деген Ақ үй баспасөз өкілі.

«Бір белдеу, бір жол» жобасынан Аустралияның түбегейлі бас тартуы бұл жобадан бас тартатын елдердің қатарын молайтуы мүмкін. Бұған Қытай мен Батыс елдері арасындағы қайшылықтың тікелей әсері бар.

“The Qazaq Times”