Қытайдың Чиңдау (Циндао) қаласында коронавирус жұқтырғандар анықталуда. Ел билігі қаланың 9 миллион тұрғынын толықтай коронавирусты анықтау тестінен өткізбек.

Ресми мәліметтерге қарағанда, коронавирус шетелден қайтып келген азаматтары арасында байқалған. Қала тұрғындарын толық тестілеуден өткізу бұған дейін Ухан қаласында болған еді. Мамыр айында Ухандағы 11 млн шамасындағы қала тұрғыны тесттен өткен еді.

Чиңдау қаласының Денсаулық сақтау басқармасы өзінің әлеуметтік желідегі парақшасында коронавирус жұқтырған 6 адамның анықталғанын, тағы 6 адамның симптомсыз екенін хабарлады. Вирусқа шалдыққандар саны аз болса да, әрі оның бәрі бақылауға алынса да қалада тестілеу өтпек.

Қытай қазір коронавирусты қатты бақылауға алып тұр. Қытаймен салыстырғанда АҚШ пен Еуропада вирус біршама кең тарап кеткен. Дегенмен, Қытай өзінің авторитарлық режимі арқылы коронавирусты бақылауға алуды имиджі үшін пайдаланып отырғаны да байқалады.

“The Qazaq Times”