Көрнекі сурет. Фотоколлаж: Скопина Ольга / Красная Весна АА

Бүгін Үкімет отырысында энергетика министрі Нұрлан Ноғаев биыл қаңтар мен қыркүйек аралығында 64,7 млн тонна мұнай өндірілгенін мәлімдеді.

Министрдің келтірген дерегі бойынша,елде мұнай өндіру көлемі 64,7 млн тоннаға жеткен. 9 айдың жоспары 100,5% пайызды құрады. Оның ішінде 20,2 млн тонна мұнай Теңіз кеніішіне тиесілі. Ал Қашаған кен орнында мұнай өндіру көрсеткіші 11,5 млн тоннаға жетсе, Қарашығанақ кенінде 9 млн тонна өндірілген.

Экспортталған мұнайдың көлемі 52,2 млн тонна. Жоспар 100%-ға орындалды деп сүйіншілеген Ноғаевтың хабарына қуана қою ерте. Себебі пандемиямен қатар келген экономикалық дағдарыс кезінде шикізат айналымы мен нарығы бұрын болмаған деңгейде құлдырады. Сондықтан баррель мұнайдың бұрынғы бағасы келмеске кеткендей, содан болар бюджет түсімі айтарлықтай ортайған.

ҰЭМ-ға қарасты Статистика комитетінің дерегінше, былтыр 90,5 млн тонна көлемде шикі мұнай мен кондесат өндірілген. Биылғы қарқын да жаман емес. Дегенмен табыс өткен жылғыдай болмасы анық. Бұл бағытта Үкімет қандай шара қабылдап жатқаны әзірге белгісіз.

"The Qazaq Times"