Сооронбай Жээнбеков. Фото: www.azattyk.org

Қырғызстан президенті Сооронбай Жээнбеков елде саяси жағдай тұрақталса, қызметінен өз еркімен кетуге дайын. Бұл туралы Азаттык Үналгысы хабарлады.

Үкімет басшысы болып тағайындалған Садыр Жаппаровтың мәлімдеуінше, президент биліктен ың-шыңсыз кеткісі келетінін білдірген. Халыққа кезекті үндеуінде Жээнбеков: «Қазір бастысы – мемлекеттің тұтастығы. Осы мақсатта қажетті шешімдер қабылдауға, импичмент мәселесін талқылауға дайынмын», – деді.

Қырғызстан парламенті 2 күн бұрын Жээнбековке импичмент жариялау мәселесін қарауға кріскен. Парламентте кворум болуы үшін 60-тан астам депутат болуы қажет.

5 қазанда Бішкекте парламент сайлауының нәтижесімен келіспейтін саяси партиялардың митингі өтті. Олар 4 қазандағы сайлаудың нәтижесін жарамсыз деп тауып, жаңа сайлау өткізуді талап етті. Кейінірек бұл акция демонстранттар мен құқық қорғау органы қызметкерлері арасындағы қақтығысқа айналды. Ресми мәліметтер бойынша, қақтығыстан 1000-ға жуық адам жарақаттанған.

Сол күні наразы топ қамауда отырған бірқатар саясаткерді түрмеден босатып алды. Олардың қатарында Қырғызстанның парақорлық айыбымен 11 жылға сотталған бұрынғы президенті Алмазбек Атамбаев, бұрынғы премьер-министр Сапар Исаков, Жоғарғы Кеңестің бұрынғы депутаттары Равшан Джеенбеков және Садыр Жапаров бар.

Айта кетейік, Сооронбай Жээнбеков – Қырғызстанның бесінші президенті. Ол 2017 жылы қазанда конституцияға сай мерзімде президент болып сайланған. Жалпы Тәуелсіздік алған 30 жыл ішінде елде төрт президент ауысып, оның екеуі шетелде бас сауғалауға мәжбүр болған.

"The Qazaq Times"