Елдегі бұқаралық жиындарға тоқтау салынғанына байланысты Алматы марафоны мен көктемгі  жүгіру жарысы да өтпейді.

«13 наурыздан бастап Қазақстанда көпшілік қатысатын жиындарды өткізуге тыйым салынды. Бұған себеп – коронавирустық пандемия. Сондыөтан біз көктемгі жүгіру жарыстары және ең айтулы «Алматы марафоны» жобасын өткізе алмаймыз, – деп мәлімдеді ұйымдастыру тобының өкілі, «Бірінші болу – батылдық» корпоративтік қорының атқарушы директоры Салтанат Қазыбаева.

Бұған дейін Токиода, Римде және Сеулде халықаралық марафондар тоқтатылған. Алматы марафонына көп дайындық жүргізілген еді, өйткені көктемгі жарыс 14 наурыз, ал марафон 19 сәуірде болатын жоспарланған болатын.

Сонымен қоса ашық жаттығу өткізу де уақытша тоқтатылмақ. Ұйымдастыру тобы алдын-ала тіркелген қатысушылардан «өзіне бағынбайтын форс-мажор жағдайына сабыр танытып, түсіністікпен қарауын сұрайды».

«Алматы марафоны» – қашықтығы 42 км 195 м болатын жыл сайынғы халықаралық жүгіру жарысы, тіпті Орталық Азиядағы ең үлкен спорттық оқиға деп бағаланады.

"The Qazaq Times"