Табыс таразысындағы тап көрінісі. Фото: Central Asia Monitor

Қазақстан бай-дәулеттілер саны бойынша ТМД елдері арасында екінші орынға жайғасты.

Жақында Knight Frank халықаралық консалтинг компаниясының The Wealth Report 2020 есебі жарияланыпты. Finance.kz  телеграм арнасының дерегінше, былтыр әлемде жеке активі 30 миллион доллардан асатын ультрахайнеттер немесе табысы өте қомақты адамдар қатары (UHNWI)  31 мыңға көбейген.

Дүние жүзі бойынша аталған параметрмен 9-шы, ал ТМД кеңістігінде бірінші орында тұратын Ресейде мұндай бай-бағландардың саны  9 мыңға жеткен.  Сондай-ақ Украинада – 382, Түркіменстанда – 104, Беларуссияда – 28, Тәжікстанда – 16, Өзбекстанда – 12 отыздық лимон иесі бар болса, Қырғызстанда мүлдем жоқ. Ал  Қазақстан дәл осы қырынан алғанда ТМД-да екінші орында.

Ratel сайтының дерегіне қарағанда, әлемдік рейтингте Қазақстан 660 бай-ауқатты адамымен 45-ші Индонезия және 50-ші Филиппин арасына тұрақтаған көрінеді. Алғашқы орынды – 240 мың ультрамиллионерімен АҚШ, екінші орынды – 61 мың байшыкешімен Қытай иеленген.

Қазақстанда соңғы жылдары халықтың әлеуметтік өмірі қиындап, таза табысы ортайғандықтан наразы көңіл-күй өршіп, саяси сипат ала бастады.

"The Qazaq Times"