Еуропалық кеңес басшысы Дональд Туск және Қазақстан президенті Қасым-Жомарт Тоқаев кездесуінен соң. Фото: https://dixinews.kz

Брюссельде өткен Қазақстан – Еуроодақ ынтымақтастық кеңесінің 17-отырысында тараптар кеңейтілген серіктестік және ынтымақтастық туралы келісімді ратификациялады.

Аталған келісім халықаралық және аймақтық қауіпсіздік, сауда мен инвестициялар, инфрақұрылым мен инновациялар, мәдени және гуманитарлық байланыстарды дамытуға бағытталған. Басқосу барысында әлемдегі жағдай, Орталық Азия бойынша Еуроодақтың жаңа Стратегиясын жүзеге асыру және президент Қасым-Жомарт Тоқаевтың Брюссельге ресми сапары талқыланды.

Қазақстан Сыртқы істер министрі Мұхтар Тілеуберді: «Келісім тез арада күшіне енеді деп ойлаймыз. Нақты айтқанда, 1 наурызда деген үмітім бар. Оны жүзеге асыру табысты әрі өзара тиімді ынтымақтастығымызды дамытуға көп мүмкіндіктерді ашпақ. Ең алдымен, ол серіктестігіміздің жаңа басымдықтары мен салаларын белгілейді. Ынытымақтастық бойынша Кеңес мәжілістері бұл келісімді іске асыруға шоғырланады. Ол ынтымақтастығымыздың барлық салаларын: саяси, әлеуметтік, экономикалық және мәдени тұстарын қамтыған», – деді.

Еуропалық одақ – Қазақстанның ең ірі инвестициялық серіктесінің бірі. Қазақстан Орталық Азия елдерінің ішінде ЕО-мен кеңейтілген серіктестік және ынтымақтастық туралы келісімге ең бірінші қол қойған болатын. Былтыр жылдың соңғы 9 айында екіжақты тауар айналымы 24 миллиард долларға жуықтаған.

"The Qazaq Times"