Алматы әкімінің грантын алушы қаламгерлердің екінші легі. 20 желтоқсан 2019 жыл. Фото: Алматы әкімдігі

Кеше Алматы әкімі Б. Сағынтаев Қазақстан Жазушылар одағының алматылық мүшелеріне арнайы грант табыстады.  

Кездесу барысында шығармашыл 60 жазушы әкім грантының иегері атанды. Бұған дейін атаулы грантты 90 жазушы, ақын және әдеби сыншылар алған болатын. Әр грант иегеріне 500 мың теңге көлемінде сертификат ұсынылды.

Әкімдіктің баспасөз қызметінің мәлімдеуінше, грант жас жазушылардың шығармашылық әлеуетін ашуға қолдау көрсету және қалыптасқан сөз зергерлерін атап өту жөніндегі игі шаралардың бірі болып табылады.

Шаһар басшысы Бақытжан Сағынтаев  өз сөзінде кітап шығару бойынша, Жазушылар үйін жөндеу ісінде, шығармашылық конкурстарды өткізуде қаланың тиісті қолдау көрсететінін атап өтті.

Алдағы жылы жазушылар мен ақындар келер жылы Абай мен әл-Фарабидің құрметіне өтетін мерейлі шаралардың, сонымен қатар Алтын Орданың 750 жылдығын атап өтудің контентін қалыптастыруға өз үлестерін қоса алады.

Грант иегерлері. Фото: Алматы әкімдігі

"The Qazaq Times"