Ең жас бакалавриат Лоран Симонс. Фото: Вокруг Света Украина

Бұған дейін 10 жасында университет бітірген америкалық Майкл Карни әлемдегі ең жас жоғары білім иесі аталып келген. Жақанда нидерландтық ақылды жас Лоран Симонс бұл көрсеткішті тағы бір жасқа қысқартпақ. Ол 9 жасында Эйнховен техникалық университетін тамамдау алдында тұр.

Лоран Симонс мектептің алты жылдық бастауыш және орта білімдерін небары бір жарым жыл ішінде игеріп, 8 жасында жоғары орта білім программасын тауысқан. Аталған университетте ол жоғары білім программасын да өз курстастарынан бұрын тамамдап үлгірген.

Оның IQ деңгейі 145-ке пара-пар болып, әлемдегі ең ақылды адамдар қатарында тұр. Өзінің айтуынша ең сүйікті пәні математика, одан тыс геометрия, алгебра және статистика пәндерін де сүйіп оқиды. Болашақ арманы кардиохирург болу және адамдардың ғұмырын ұзартудың жолын тауып шығу.

Лоран Симонстың анасы голландиялық, ал әкесі Бельгиялық. Бельгияда туылған Лоран Симонс нәресте шағында Голландияға отбасымен қоныс аударған екен. Ата-анасы оның болашақ қандай маман болуын өз еркіне қойған екен. «Тек өзін бақытты сезінсе болды», – дейді Лоранның ата-анасы.

“The Qazaq Times”