Сеул Пиоңяңды Пиоңчаң 2018 қысқы олимпиадасына шақырды. Фото: dw.

Оңтүстік Кореяның Корей түбегі мәселесіне байланысты құрылған Бірлесу министрлігінің басшысы Чо Миң-гион Солтүстік Кореямен шартсыз келіссөз үстеліне келуге дайын екендерін мәлімдеді. Бұл туралы «People» басылымының ресми сайты хабарлады.

Аталған министрліктің мәлімдемесінде министр Чо Миң-гион Солтүстік Кореямен екі ел арасындағы барлық мәселе туралы ашық әрі шартсыз келіссөз өткізуді қалайтынын жеткізген. Ол және осы орайда екі ел арасындағы бүлінген қатынасты реттеп, Солтүстік Кореяның ядролық бағдарламасын тоқтатуға күш салатынын айтқан.

Министр Чо мәлімдемесінде Солтүстік Кореяны ақпан айындағы қысқы олимпиадаға қатысуға шақырды.

Бұл Солтүстік Кореяны шартсыз келіссөзге шақырған екінші мәлімдеме. Осыдан бұрын 13 желтоқсан күні АҚШ мемлекеттік хатшысы Рекс Тиллерсон Солтүстік Кореямен алғышартсыз келіссөз жүргізуге дайын екенін айтқан болатын.

“The Qazaq Times”