Әскери қоймадағы жарылыстан жарақат алғандарды аурухана әкеліп жатқан сәт. Фото әлеуметтік желіден алынды.

Жамбыл облысы Байзақ ауданындағы әскери қоймадағы жарылыс салдарынан қаза болғандар саны тоғызға жетті. Бұл туралы Төтенше жағдайлар министрлігі хабарлады. 

Министрлік таратқан соңғы ақпаратқа қарағанда, түстен кейін төрт адамның қаза болғаны анықталған. Қазір олардың кім екені анықталып жатыр. Бұдан бөлек, төрт адам әлі із-түссіз.

Бұған дейін Қорғаныс министрлігі жарылыстан 5 адам мерт болғанын хабарлаған. Олар:

  • Сержант Мешінбай Марат Сайлауұлы, 40 жаста;
  • Ефрейтор Жанболатов Руслан Жүрсінбайұлы, 40 жаста;
  • Әскери күзет қызметкері Далибаев Оразбек Дайрабекұлы,  52 жаста;
  • Оңтүстік өңірдің әскери прокуроры Арман Қапезов;
  • Өрт сөндіру командасының бастығы, келісім-шарт қызметінің старшинасы Еркін Ерікбайұлы Нәдірбеков, 42 жаста.

Кеше, 26 тамыз күні кешке Жамбыл облысы Байзақ ауданында Қорғаныс министрлігіне қарасты әскери бөлімшенің қоймасынан өрт шығып, оқ-дәрі жарылған. Қорғаныс министрлігінің ақпаратына қарағанда, 6 мәрте жарылыс болған.

The Qazaq Times