Құрлықтық жаттығуға 10 мың сарбаз тартылмақ. Фото: profilenews.com

Ресей мен Қытай тамыз айында ортақ әскери оқу-жаттығуын өткізбек. Қытай жерінде өткізілетін әскери шара «Өзара әрекет2021» деп аталады.

Қытай мен Ресей Қорғаныс министрліктерінің мәліметіне қарағанда, құрлық әскери жаттығуына 10 мың сарбаз тартылады. Одан бөлек ұшақтар мен саутты көліктерді қамтыған бірқатар  әскери техника да қатыстырылады.

Қос тараптың ресми мәлімдемелерінде жаттығудың мақсаты екі ел қарулы күштерінің өзара ынтымақтастығын күшейту деп көрсетілген. Ресей-Қытай қарым-қатынасын, әсіресе стратегиялық ортақ әрекеттесу мүмкіндіктерін арттыру, соғысқа қарсы дайындықтарын жетілдіру мақсатында өтетітіні айтылған.

АҚШ бастаған Батыс елдерінің санкциялық, дипломатиялық және саяси қысымдары арта түскен кезде, Бейжің мен Мәскеу бір-біріне жақындай түсті. Екі ел арасында стратегиялық серіктес деңгейіндегі қарым-қатынас Орта Азия елдері үшін де назар аударарлық тақырыпқа айналған.

“The Qazaq Times”