Фото: Olympic.kz

Қазақстан үкіметі Токиода өтетін ХХХII жазғы Олимпиада ойындарында алтын медаль жеңіп алған спортшыға 250 мың доллар сыйақы береді. Бұл туралы бүгін, 2 шілдеде Орталық коммуникациялар қызметінде өткен брифинг кезінде мәдениет және спорт министрі Ақтоты Райымқұлова айтты.

Министрдің айтуына қарағанда, жеңімпаз атанған немесе жүлдеге ілінген спортшы жетістігі дәлелденген соң ғана белгіленген сыйақыны ала алады.

«Бұл жолғы Олимпиада жеңіске жеткен спортшыларға, олардың ұстаздарына, бапкерлеріне арналған әрбір спорт түрі бойынша сыйақы беру туралы ережелер қабылданған болатын. Өздеріңіз білесіздер, осы құжат бойынша бірінші орын алған спортшыға 250 мың доллардан беріледі. Екінші орынға 150 мың доллар, үшінші орын 75 мың доллар болып азая береді. Әрине, ең алдымен спорт жетістігінің нақты екені дәлелденген кезде бұл сыйақы теленеді. Заңды түрде осылай негізделген» деді журналист сұрағына жауап берген министр.

Токио Олимпидасы 23 шілдеде басталады.  Қазақстан құрамасының еншісінде спорттың 27 түрінен 96 жолдама бар.

Қазақстан жазғы Олимпиада ойындарына тәуелсіз ел ретінде сегізінші рет қатысқалы жатыр.

«The Qazaq Times»