Тамыз есебі: азық-түлік қалай қымбаттады?

Ұлттық экономика министрлігі Статистика комитетінің дерегінше, азық-түлік бағасы бір жылдық салыстырмалы есеп бойынша  9%-ға өскен.

Былтырғы тамыз айындағы көрсеткіштерге қарағанда биылғы цифрларда едәуір қымбатшылық байқалады.  Нан өнімдері және жармалар, ет, балық және теңіз өнімдері, сүт өнімдері, жұмыртқа, май және тоңмай, көкөністер, қант, кондитерлік өнімдер, алкогольсіз сусындар және алкогольді ішімдіктер қымбаттады, ал жаңа жиналған жемістер науқанға байланысты шамалы арзандады.

Жарма өнімдері тобында бағаның әр бағытта өзгеруі белгіленген. 2019 жылғы тамызда күрішке орташа баға 374 теңгені, 2018 жылғы тамыздағы килограмына 306 теңгені құраған. Құмшекердің орташа бағасы 2019 жылғы тамызда килограмы 233 теңгеге жетсе, былтырғы тамызда 223 теңге болған.

2019 жылғы тамызда ет және ет өнімдерінен сиыр етінің жауырын-төс бөлігіне орташа баға килограмына 1713 теңгені (2018 жылғы тамызда – 1506 теңге), сүйегі бар қой етіне – 1648 теңгені (1433 теңге), сүйегі бар жылқы етіне – 1933 теңгені (1695 теңге), шошқа етінің жауырын бөлігіне – 1416 теңгені (1281 теңге), шала ысталған шұжыққа – 2109 теңгені (1928 теңге), тауықтың сан етіне – 812 теңгені (663 теңге) құрады.

Тәуелсіз сарапшылар мен ел азаматтарының айтуынша, азық-түліктің ресми деректерден әлдеқайда жоғары бағада сатылуда. Өткен аптада Үкімет ең маңызды активті тауарлар мен негізгі азық-түлік түрлерінің орынсыз қымбаттамауын бақылау жөнінде міндеттеме алған еді. Бірақ шынтуайтына келгенде, күнделікті өмірде дүкен сөрелеріндегі тауарлардың бағасы біршама өскен. Экономист мамандар мұны «дәстүрлі» түрде көздің тамшысындай етіп өсірілетін жалақы үрдісі мен бетімен кеткен кәсіпкерлердің  бақылаусыз болуымен байланыстырады.

Қымбатшылық бүйірден қысқан қазақстандықтар, соның ішінде әлеуметтік осал топтарға қандайда бір қолдау шаралары қалай өрбитіні әзірге белгісіз. Жылма-жыл негізсіз қымбаттайтын кейбір тауарлар отбасылық бюджетке, жатақхана-пәтерде тұратын студенттерге салмақ салып отыр. Бір айдың ішінде доллар теңгеге шаққанда 390-ға екі рет көтеріліп, құлады. Тоқаев уәде еткендей Тамыз кеңесіндегі педагогтардың еңбекақысын алдағы төрт жылда екі есе арттырамыз дегені  мына қарқынмен 2023 жылы бүгінгідей де құны болмауы мүмкін деген қауіп бар.

2019 жылғы тамыздағы азық-түлік тауарларының жекелеген түрлеріне орташа бағалар

                                                                                                                                         килограмм теңгемен

Ескерту: Тамақ өнімдерінің бағасын тіркеу меншіктің барлық нысанындағы сауда кәсіпорындарының іріктеме желісі бойынша және Қазақстанның ірі қалаларындағы қалалық базарларда жүзеге асырылады. Республика бойынша орташа баға деңгейі Нұр-Сұлтан, Алматы, Шымкент, Семей қалалары, облыс орталықтары және аудандардың іріктелген шеңберінің баға деңгейінен салмақталған шамасы ретінде анықталады.

"The Qazaq Times"