Фото: AP

Қырғызстанның бұрынғы президенті Алмазбек Атамбаев арнайы жасаққа қарсы оқ атқанын растады.

7 тамызда өткен экс-президентті ұстау операциясы кезінде екі тарап бір-біріне оқ жаудырған. Оқиғадан кейін мәлімдеме жасаған Атамбаев: «Менің жақтастарымда қару-жарақ болған жоқ. Сол себепті өзім оқ аттым», – деп мәлімдеді. Қазіргі биліктің «қатыгездігіне таңқалатынын» жеткізген Атамбаев арнайы операция барысында қолға түскендерге көмек қолын созуға дайын екендігін де айтты.

Қырғызстанның бұрынғы президентінің Қой-Таштағы үйінде болған операция кезінде арнайы жасақ өкілі қаза тауып, 45 адам ауруханаға түскен. Осыған байланысты пікір білдірген Сооронбай Жээнбеков: «Алмазбек Атамбаев заңды тергеу жұмыстарына қарулы қақтығыс көрсету арқылы Конституция мен заңды табанына таптады. Қырғызстан құқықтық мемлекет. Биліктің басты міндеті әр азаматтың заңды орындауын қамтамасыз ету», – деді.

"The Qazaq Times"