Көрнекі сурет. Фото: http://mfa.gov.kz

Қазақстан Сыртқы істер министрі Бейбіт Атамқұловтың АҚШ-қа сапары басталды. Ресми сапар АҚШ Мемлекеттік хатшысы Майк Помпеоның жеке шақыруы бойынша Құрама Штаттың Тәуелсіздік күні және Қазақстанның дипломатиялық қызметі күнімен тұспа-тұс келіп отыр.

Б.Атамқұлов АҚШ президенті әкімшілігі, Мемлекеттік департамент басшылығы және сарапшылар топтарының өкілдерімен екіжақты кездесулер өткізбек. Сапар барысында Америка мен Қазақстан арасындағы дипломатиялық, стратегиялық қарым-қатынас талқыланады.

Тәуелсіздік жылдары ішінде Америка компаниялары тарапынан Қазақстанға 50 миллиард доллардан астам инвестиция құйылған. 2018 жылы екі ел арасындағы тауар айналымы 2 миллиард долларға жетті. 2017 жылмен салыстырғанда 2018 жылы олардың көлемі 44,7%-ға өсіп, 5,3 млрд АҚШ долларына жеткен.

Айта кетейік, бұл Б.Атамқұловтың ҚР сыртқы саяси ведомствосының басшысы ретінде және Қасым-Жомарт Тоқаевтың Қазақстан президенті лауазымына сайланғаннан бергі алғашқы сапары. 2018 жылы бұрынғы президент Н.Назарбаев Уашингтонда Ақ үй басшысы Дональд Трамппен кездесу өткізіп, стратегиялық әріптестік мәселелерін талқылаған.

"The Qazaq Times"