Photo: news.tj

Германияның Тәжікстандағы елшісі Найтхарт Хефер-Виссинг ел билігінің бірнеше рет Германиядағы тәжік оппозиционерлеріне қатысты алаңдаушылық білдіріп, оларды экстрадициялауды талап еткенін айтты.

«Біз Тәжікстан билігіне тәжік оппозиционерлердің тарапынан жасалған қылмыс не заңсыз іс-әрекеттеріне байланысты нақты дәлелдері болса, бізге жіберуін айттық. Біз оларды тексеріп, шешім қаьылдаймыз. Германияда адамның кінәсін тек сот қана анықтайды» - деді неміс дипломаты.

Германия Тәжікстанда тыйым салынған "Ислам қайта өрлеу партиясының" қолдаушылары көптеп тұрақтаған Еуропа елдерінің бірі. Сондай-ақ, тәжік билігімен келіспеген ғалымдар мен журналистер де Германияны паналап жүр.

Сонымен бірге, неміс дипломаты Герман билігін босқындардың саяси көзқарасы қызықтырмайтынын атап өтті. Олар тек жергілікті заңдарды бұзғанда ғана жауапкершілікке тартылады деді ол.

Айта кетейік, Еуропа елдерінен баспана іздеушілердің саны 2015 жылдың күзінен бері көбейе бастады. Оған Душанбеде "Ислам қайта өрлеу партиясы" мен "24-тобының" террористік ұйымдар деп жариялануы себеп болды.

"The Qazaq Times"