Ресей СІМ Сергей Лавров. Фото: livejournal.com

Азов маңындағы жағдай шиеленісіп барады. Бұл оқиғаға қатысты Ресей СІМ Сергей Лавров Батыс елдерін айыптады.  

БҰҰ-ның қауіпсіздік кеңесі шұғыл кездесу өткізіп, екі ел арасындағы мәселені талқылайтын болды. Ресей Сыртқы істер министрі Сергей Лавров бұл оқиғаны «Украина тарапынан жасалып отырған арандатушылық әрекет. Сол себепті Киевті және осы іске итермелеп отырған Батыс елдерін орнына қою керек» – деген мәлімдеме жасады. Қанша дегенмен Мәскеу өз кінәсіздігін айтып, бой бермей отырғанмен, Еуропалық Одақ құрамындағы мемлекеттер Ресейді қатаң сынға алды. Олар Ресей тарапынан теңіздегі кемелердің еркін қозғалысын қайта қалпына келтіруді талап етіп отыр.

Айта кетейік, 25 қарашада Украинаның ұлттық қауіпсіздік және қорғаныс қызметі елде соғыс жағдайын енгізуді ұсынған болатын. Оған Ресейдің арнайы барлау қызметі  Украинаның әскери теңіз күштерінің үш кемесін басып алып, соққы жасағаны себеп болды. Мұнымен қоса Ресей Қара теңізде Украина кемелеріне оқ атқан. Салдарынан Украина теңіз әскери күшінің бірнеше әскері жарақаттанды.

"The Qazaq Times"