Фото: ca-news.org

Түркіменстан астанасы Ашхабаттағы мемлекетке қарасты дүкендерде азық-түлік тек шектеулі мөлшерде ғана әрі тек ересектерге сатылуда. Мәселен, қант пен жұмыртқа сатып алушылар 1 килограмм қант пен 10 жұмыртқадан асырмау керек. Бұл туралы «Түркіменстан жаңалықтары» басылымы хабарлады.

Азық-түліктер алдын ала таразыға тартылып қойылған. Балаларға ешқандай тағам түрлері сатылмайды. Сатушылардың айтуларынша, егер балаларға да азық-түлік сатылатын болса, онда ата-аналар тапшы тауарлар үшін балаларын кезекке қойып қояр еді дейді.

Өткен жылдың күз айларынан бері Түркіменстанда азық-түлік тапшылығы қатты артуда. Ашхабаттан тыс аймақтарда ұн, нан, қант және күнбағыс майы сынды өнімдерге кезек күшейген. Куәгерлердің айтуларынша, кейде мұндай оқиғалардың соңы жанжал мен ұрыс-керіске де ұласады екен. Тіпті елдің солтүстігінде тұрғындар кебек тиелген жүк көліктеріне шабуылдайтын жағдайға жеткен.

Халықаралық ресми ұйым сарапшылары Түркіменстандағы азық-түлік тапшылығы мен баға өсімін елдегі валютаның жетіспеушілігі мен өткен жылғы астық көлемінің аздығынан туындаған деп бағалайды.

“The Qazaq Times”