Трамп және Ши Жинпиң. Фото: voachinese.com.

CNN арнасының хабарына қарағанда, АҚШ президенті Дональд Трамп Флорида штатында өткен бір реткі үкімет отырысында Қытай компартиясының ел Конституциясына өзгеріс енгізу ұсынысы туралы пікірін білдірген. Трамп сөзінде Қытай басшысының мерзімсіз билікке ұмтылып жатқанын айта келіп: «Ол қазірдің өзінде шексіз мерзімдегі мемлекет төрағасы болып отыр», – деген. Бұл туралы аталған америкалық телеарнаға сілтеме жасай отырып, VOA ақпараттық сайты хабарлады.

Трамп сөзінде: «Ол мұны істей алады, меніңше бұл ғажап іс. Мүмкін уақытында біз де оны сынап көрерміз», – деген. Алайда, оның сөзі күлкі мен мысқыл аралас айтылған. CNN мен VOA хабарында: «Оның бұл сөзі әзіл ме, әлде шын ниеті ме? – бұл жағы бізге түсініксіз», – делінген.

26 ақпандағы баспасөз конференциясы кезінде, Ақ үйдің ресми мәлімдемешісі Сара Сандрстен Ши Жинпиңнің өкілетті мерзімін ұзарту ісі туралы сұрағанда: «Менің ойымша бұл Қытайдың өзі үшін ең жақсы талғам», – деген пікірін айтқан.

“The Qazaq Times”