Фото: University of Texas

АҚШ-та Техас университетінің ғалымдары қатерлі ісік жасушаларын 10 секундта анықтайтын құрылғы ойлап тапты. Сырт көрінісі қаламға ұқсайтын қалтаға сыйымды құрылғы қауіпті дертті уақытылы нақтылауға, ота жасауға пайдаланылуы мүмкін. Бұл туралы BBC ақпараттық агенттігі жазды. 

Science Translational Medicine журналында жарияланған сынама қорытындылары құрылғының 96 пайыз жағдайда тиімділігін дәлелдеген. MasSpec Pen деп аталатын медициналық қалам күдікті жасушаның бетіне бір тамшы су  жіберіп, сұйықтыққа жиналған жасуша ішіндегі бөгде заттарды қайта сорып алып, зерттеуге береді.

Медицина қызметкерлерінің айтуынша, қатерлі ісікті алып тастауға арналған оталардың қиындығы зақымданған және  сау жасушаларды бір-бірінен ажырата алуда. Қатерлі ісік жайлаған жасушалардың бірі назардан тыс қалып қойса, дерт ағзада қайта таралуы мүмкін. Ал егер сау жасушаға дәрігердің құралы тиіп кетсе, ми сияқты бөліктердің отасы кезінде қиындық туындауы мүмкін. Ал жаңадан ойлап табылған құрылғы оталарды қауіпсіз, жылдам әрі нақты жасауға мүмкіндік береді.

“The Qazaq Times”