Фото: BBC

Қазір АҚШ-тан саяси пана алып отырған тегі түрік, ислам дінінің уағыздаушысы Фетхуллах Гюлен Анкараның оны елге экстрадициялау туралы өтініші қанағаттандырылса, қарсылықсыз отанына оралатынын жеткізді. Бұл туралы ол  Reuters агенттігіне берген сұхбатында мәлімдеді.

Осылай Фетхуллах Гюлен Түркия басшылығының оны экстрадициядан бас сауғалап, Канадаға қашуы мүмкін деген мәлімдемесін жоққа шығарды. Дегенмен ол АҚШ Үкіметінің Түркияның сұрауына оң жауап қайтармайтынынан үмітті екенін жасырмады.

Осыдан бұрын Түркия Президенті Реджеп Тайып Ердоған АҚШ Президенті Дональд Трамптан Фетхуллах Гюленді өз мемлекетіне экстрадициялау туралы сұрағанымен, Американың Әділет министрлігі осы іске қатысты жеткілікті дәлелдер келтірмегені себепті, бұл өтінішті қанағаттандыру орынсыз деп отыр.

Естеріңізге сала кетейік, 2017 жылдың мамыр айында Түркия Фетхуллах Гюленді өткен жылдың 15 шілдесінде орын алған мемлекеттік төңкеріс үшін жасалған талпыныстың ұйымдастырушысы деп кінәлаған еді.

“The Qazaq Times”