Қытай СІМ мәлімдемешісі Гың Шуаң. Фото: sinovision.net.

Қытай Орталық телевизиясының бүгінгі хабарында, Солтүстік Кореяның 4 маусым күні «Марс-14»  атты зымыранын ұшырғаны туралы айтылды. Сонымен бірге, осы әрекетке қарата Қытайдың Сыртқы істер министрлігінің мәлімдешісі Гың Шуаң баспасөз жиналысында Біріккен Ұлттар Ұйымы Қауіпсіздік келісімшарттарын бұзып,  ешбір елдің ескертуін елеп-ескермей өз бетінше көп рет зымырандар сынағын жасаған Солтүстік Корея билігін сынға алды.

Гың Шуаң сөзінде: «Қытай үкіметі түбек мәселесі жайлы ежелден бері ұстанып келе жатқан пікірінен ауытқымайды. Біз Солтүстік Кореяның БҰҰ Қауіпсіздік  келісімшарттарын  бұзғанын айыптаймыз, әрі,  қатаң ескертеміз. Сондай-ақ, күннен-күнге ушығып келе жатқан Корея түбегі мәселесін одан ары шиеленістірмей, әр елдің сабыр сақтап,  бейбіт келісімдер арқылы кеңесуін үміт етеміз» - деді.

Іргелес елдер ғана емес,  жасыл шардағы көптеген мемлекеттерді алаңдатып отырған Корея түбегі мәселесі шешім таппағанына ширек ғасыр өтті. Қайшылықтың шешім табуынан үміт оты көрінсе,  зымырандарын сынаққа алып шығатын Ким әулетінің тәуекелшілдігінен төрт төңірек тіксініп отыр.

Әділет Ахметұлы

“The Qazaq Times”