Түрік және Тунис СІМ басшылары. Фото: "Түрік Теле-Радио".

Катар дағдарысы басталғалы бері, Түркия жақ белсенді ара-ағайындық жасап келеді. Түрік президенті Ердоған да бұл іске белсене кіріскені байқалады. «Анатолы» ақпараттық агенттігінің хабарына қарағанда, Түркияға сапарлай барған Тунис сыртқы істер министрімен кездескен Түркия СІМ басшысы Мәвлут Чавшоғлұ да Түркияның Катар дағдарысын жақсартуға барын салатынын айтқан.

Түрік СІМ басшысы сөзінде: «Біз бауырлас елдер арасындағы дипломатия дағдарысын жақсартуға, шын ниетімізбен күш салып келеміз. Бұл кезекте Тунис те өзінің оң ықпалын көрсетіп отыр. Дегенмен мұсылмандардың қасиетті айында кейбір араб елдерінің бауырлас Катарға мұндай қысым жасауы мұсылмандыққа жат», – деді.

Екі ел министрлері бір ауыздан Катар дағдарысын оңау үшін Шығанақ ынтымақтастық кеңесінде ортақ талқылап, келіссөздер арқылы ғана шешіледі деп тапты. Тунис жақ аталған мәселені шешуде Түркияның ұстанымын толықтай қолдайтынын жеткізді.

“The Qazaq Times”