Фото: White Helmets

АҚШ Сүрия Үкіметін "жергілікті халыққа қарсы химиялық қару қолданды" деп айыптады. АҚШ мемлекеттік департаментінің ресми өкілі Хизер Нойерт Шығыс Гутада Үкімет әскері хлорлы газ қолданғанын мәлімдеді. Бұл туралы Әл-Жазира ақпараттық агенттігі жазды. 

Хизер Нойерт өзінің твиттер парақшасында: "Ресей өз ықпалын пайдаланып, Сүрияның әрекетіне тосқауыл болмау арқылы дұрыс таңдау жасаған жоқ. Өз халқына қарсы химиялық қару қолдану - ар-ожданға қайшы келетін әрекет" деп жазды. Ресей Сүрия Үкіметінің жақын одақтасы ретінде осыған дейін өңірдегі химиялық қару қолданысын зерттеу туралы БҰҰ-ның резолюциясына вето құқығын пайдаланып, тоқтау салған еді.

Шығыс Гута - Сүриядағы басқыншы топтардың қол астындағы аумақтардың бірі. 2013 жылдан бері Сүрия Үкіметінің шабуылына ұшырап келеді. Бұл аймақта 400 мың адам тұрады және жергілікті халық азық-түлік тапшылығы мен дәрі-дәрмек жетіспеушілігінен зардап шегіп отыр. Жуырда Венада өткен кездесу кезінде жасалған Шығыс Гутада оқ атпау туралы келісім небәрі бірнеше сағатқа қана созылған.

 “The Qazaq Times”