Көрнекі сурет. Фото: ашық дереккөз

Сыбайлас жемқорлыққа қарсы іс-қимыл агенттігінің баспасөз қызметінің хабарлауынша,  «Қазақстан темір жолы»  Сары-Шаған жол дистанциясы филиалының директоры аса ірі көлемде қаражат ұрлағаны үшін сотталды.

Бұған дейін Жамбыл облысының сыбайлас жемқорлыққа қарсы қызметі «Жамбыл магистральды желісінің бөлімі» – «ҚТЖ» ҰК» АҚ филиалының Сары-Шаған жол дистанциясы (ПЧ-48) директоры Т.Қыдырбаевқа қатысты тергеу жүргізген болатын.

«Ол жанар-жағармай материалдары мен бағыттама бұрмасының металл бөлшектерін негізсіз есептен шығару арқылы аса ірі көлемде – жалпы сомасы 16 миллион 78 мың теңге бюджет қаражатын жымқырғаны үшін күдікке ілінді. Тергеу барысында келтірілген шығын толығымен өтелді», – делінген агенттік хабарламасында.

Өткен аптаның бейсенбісі, 26 желтоқсан Қарағанды облысына қарасты Приозерск қалалық сотының үкімімен Т.Қыдырбаев кінәлі деп танылып, өмір бойына мемлекеттік қызметтен шеттетілді және 7 жылға шартты түрде бас бостандығынан айыру жазасы кесілді.

“TheQazaqTimes”