Фото: yeniakit.com

АҚШ елшілігінің Тель-Авивтен Иерусалимге көшірілуінің салтанатты рәсіміне 86 мемлекетті шақырған Израильдің шақыртуын 54 ел жауапсыз қалдырды. Израильдің «Хааретз» басылымының хабарлауынша, олардың басым көпшілігі Еуропа Одағына мүше елдер.

Сонымен қатар, Ресей, Мысыр, Үндістан, Жапония және Мексика елдерінің де осы құттықтау рәсіміне қатыспайтындықтары белгілі болды. Еуропа Одағына мүше төрт ел — Австрия, Мажарстан, Румыния және Чехия Республикасы ғана шақыртуды қабыл алған. Ал, Еуроодаққа мүше емес, алайда Еуропа елдері болып саналатын Албания, Македония, Сербия, Украина және Грузия аталған рәсімге қатыспақ.

Бұдан бұрын да сайтымызда Еуропа Одағының АҚШ елшілігінің Тель-Авивтен Иерусалимге көшірілуін құптамағаны мен Шығыс Иерусалимді өздерінің болашақ астаналары ретінде санайтын палестина халқының көтеріліс жасап жатқаны туралы хабарлағанбыз. Бұдан кейінгі жағдайдың қалай болары белгісіз. Әзіргі белгілісі, ертең, 15 мамыр күні палестиналықтар осыған қатысты ірі марш ұйымдастырмақ.

“The Qazaq Times”