Ақжарқын Тұрлыбай

Қытай түрмесіне қамалған қандасымыз Ақжарқын Тұрлыбай ағылшын тілінен дәріс беріп, абақтыдағыларға йоганы үйретіп жүр. Бұл туралы еліміздің сыртқы істер министрлігі хабарлады.

Қытайдағы елшіміз Ақжарқын Тұрлыбаймен өткен айдың соңында жүздесіпті. Дипломаттың сөзінше, отандасымыз өзін жақсы сезінеді. Ол түрмедегі қыз-келіншектерге ағылшын тілінен сабақ беріп жүр екен. Сондай-ақ, қытай тілін қатар меңгеруде.

Есте болса, Ақжарқын Тұрлыбай 2014 жылы наурыз айында Гуанчжоу әуежайында ұсталған еді. Қытай соты алғашында отандасымызды өмір бойы бас бостандығынан айыру туралы шешім қабылдаған. Кейін, сот үкімі өзгеріп, қайта қарауға жіберілген еді. Әзірге Ақжарқын Тұрлыбайға қатысты Қытай сотының қандай шешім шығарары белгісіз.

“The Qazaq Times”