Бакири Иран делегациясын Брбссельге бастап барады. Фото: France 24

Бүгін Иран мен Еуропа Одағы арасында «ядролық келісімді» алға жылжыту бойынша келіссөздер Брюссельде өтеді. Келіссөз Иран СІМ басшысының орынбасары Али Бакири мен ЕО Сыртқы байланыстар қызметі бас хатшысының орынбасары Энрике Мора арасында болады.

Иран ядролық келісім бойынша Еуроодақ елдерімен келіссөздерін 14 қазанда бастаған болатын. Екі күн бұрын Иран СІМ тарабы мәлімдеме жасап «нәтижеге жету жолындағы» келесі келіссөз отырысына дайын екенін білдірген еді.

Өзінің әлеуметтік желідегі мәлімдемесінде Бакири бүгінгі келіссөздің басты проблемасы – қарсы тарапты келісімді ең алдымен бұзған елдің (Құрама Штаттарды меңзеп отыр – QT) қолайсыз саясатынан бас тартуға көндіру екенін айтқан. «Нәтижесіз қысымдарды үдеткен ондай саясат келіссөздердің кедергісін жоюдың орнына, мәселені шиеленістіре түседі», – деген Али Бакири.

Энрике Мора бастап барған делегация Теһранда 14 қазан күні Али Бакири басқарған Иран делегациясымен келіссөз жүргізген еді. Иранның жаңа билігі  өзіне салынған қатаң экономикалық санкцияларды жойып, сырт елдермен сауда экономикалық дамуға кепілдік алатын келіссөздерді жандандыруға ниетті екенін білдіріп келеді.

The Qazaq Times