Солтүстік Корея Жапония жағалауына қарай баллистикалық зымыран ұшырған. Фото: Scroll.in

Оңтүстік Корея, Жапония және АҚШ барлау қызметінің лауазымдылары Солтүстік Корея мәселесін талқылау үшін Сеулде бас қосқан еді. Бұл бас қосуға жауап ретінде Солтүстік Корея Жапон аралдарына жақын теңіз айдынын көздеп баллистикалық зымыран атты. Бұл туралы Оңтүстік Кореяның әскери қызметі мәлімдеді.

БҰҰ тәртібіне сай ядролық бағдарламаны жетілдіруге және баллистикалық зымыран сынағын өткізуге шектеу қойылған. Алайда, Солтүстік Корея өзіне бағытталған қатал экономикалық санкцияларға қарамастан зымыран қаруларын дамытуды жалғастырып келеді.

Соңғы уақыттарда Оңтүстік және Солтүстік Корея арасында қауіпті қару-жарақ бәсекесіне түрткі болатын әрекеттер көп рет болды. Тараптар бір-біріне жауап қылып зымыран сынақтарын өткізді. Кейбір сарапшылар бұл тенденция Корей түбегіндегі шиеленісті ушықтырып, қақтығысқа қарай бастайды деп алаңдайды.

The Qazaq Times