Қыздар университетінің мемлекеттік статусы ұлттық деңгеймен ауыстырылғанға дейінгі ректорат ғимаратының қасбеті. 2019 жыл. Фото: Almaty.tv

Антикор таратқан ақпарат бойынша, ұлттық университеттің жерін заңсыз сатты деген күдікпен Қазақ ұлттық қыздар педагогикалық университетінің бұрынғы қызметкері, Қарасай ауданының жер қатынастары бөлімі және «Азаматтарға арналған үкімет» ұйымы филиалының осы аудандағы тіркеу және жер кадастры бөлімінің басшылары ұсталды.

Бүгін, 14 қазанда Сыбайлас жемқорлыққа қарсы іс-қимыл агенттігінің Алматы облыстық филиалының баспасөз қызметі мәліметінше, ұсталғандар 2018 жылы университетке тиесілі облыс аумағында орналасқан Кемертоғандағы 9 гектар жерді заңсыз сатты деген күдікке ілінген.

«Университеттің жер телімі бірнеше телімге заңсыз бөлінген және жалған құжаттармен ұсталған тұлғаларға қатысы бар адамдарға рәсімделіп, кейін өзгелерге сатылған.
Аталған тұлғалар қылмыс іздерін жасыру және жер телімін университет балансына «қайтару» мақсатында 2021 жылғы қаңтар айында құжатсыз мемлекеттің жер қорынан Көлді кентінде санитарлық аймақта орналасқан, жеке меншікке беруге жатпайтын жер телімін заңсыз бөлген» делінген ведомство хабарламасында.

Қазір күдіктілерге сот бұлтартпау шараларын қолдану жөнінде шешім шығарған. Тергеу амалдары жалғасып жатыр.

Қазақстанда ірі жер дауы жиі көтеріледі. Соны бірі, осыған дейін ҚазҰУ қалашығындағы шұрайлы жердің кемінде 0,7 гектар бөлігі Тимур Құлыбаев иелік ететін компаниялардың біріне берілуі қоғам назарын аударған. Әлі күнге дейін бұл жер университет меншігіне толық қайтарылмады.

The Qazaq Times